Şairləri qanadında bəsləyən

İnsanların həyatını süsləyən

İncə ruhlu mələklərə and olsun!

Boynundakı dalğa-dalğa tellərə,

Qaşlarının altındakı sellərə,

Qəlbindəki istəklərə and olsun!

Gül üzündə yeni-yeni açılmış,

Xoş iyisi ürəyimə saçılmış

Qoxladığım çiçəklərə and olsun!

Qumruların yatağını oxşayan,

Pişik kimi ayağını oxşayan

Salxım-salxım küləklərə and olsun!

Buludlardan ildırımlar çaxdıran,

Göy üzündə çırağbanlar yaxdıran

Ala gözlü şimşəklərə and olsun!

Həp səninlə görüşməkdir diləyim,

Uğurunda gecə-gündüz çəkdiyim

Zəhmətlərə, əməklərə and olsun!

Gəncliyimə qanad verən, ruh verən,

Hər dəqiqə ayrı cilvə göstərən

Əlirişməz diləklərə and olsun!

Məlumatlar http://mikayilmushfiq.azeriblog.com saytından.